Иван Александрович Глухов (1927–1999) Тульский областда Суворовский райондин Кулешово хуьре лежберрин къени хизанда дидедиз хьана ва ам православидин имандин руьгьдаллаз, дамах гвачир, зегьметдал рикI алай, инсанрихъ галаз регьимлу ва хуш рафтарвал ийидай кас яз тербияламишна. Адакай инсан хьуниз зурба тагьсир хциз уьмуьрлух вич мегьрибандиз кIан хьайи ва ада вичин гьуьрмет хвейи диде Евдокия Сергеевнади авуна. 30-йисара хизан Москвадиз куьч хьана, ина Ивана 1945-йисуз школа ва 1948-йисузни – эцигунардай техникум акьалтIарна, гуьгъуьнлай шегьердин жилуправленида техниквиле кIвалахна. Алексеевское хуьруьн Тихвинский килисадин пара гьакъисагъ динэгьли хьайи ада алтарда куьмекар гудай.

Диндин рекьяй образование къачунин ниятдалди 1951-йисуз Москвадин Духовный семинариядик экечIай И. А. Глухова ам 1955-йисуз агалкьунралди акьалтIарна. Идалай кьулухъ Москвадин Духовный академиядиз кьабулай ада гьа чкани 1959-йисуз диндин илимрин кандидатдин дережа къачуналди куьтягьна. Адан дипломдин кIвалах «Писвиликай ва адан жуьрейрикай хашпарайрин илим» темадай кхьенвайди тир. Академиядин Советдин къарардалди И. А. Глухов Академияда профессорвилин стипендиат яз тунай ва инспектордин куьмекчивиле тайинарнай. Семинарияда ада катихизисдин, Урус Килисадин тарихдин, 1972-йисалайни – Академияда сектоведенидин тарсар гуз хьана. Гьа и йисуз адаз доцентдин тIварни гана.

Вичин кIвалахрай И. А. Глуховаз пак князь Владимиран III дережадин, преподобный Сергий Радонежскийдин II ва III дережайрин орденар ва патриархдин грамота ганай. 1995-йисуз ам Пак Чилел сиягьатдиз (гьяждиз) фена. И. А. Глухован уьмуьрдин эхиримжи йисар Москвадин Вири Пак Ксарин килисадихъ галаз алакъалу хьана, рагьметдиз фейила инай ам эхиримжи рекьизни акъудна; Иван Александрович Благовещенск хуьре кучуднава.

И. А. Глухов кIевелай истемишдай муаллим тир, ада дерин чирвилер гудай ва лап рикIивай имтигьанар кьабулдай. ИкI, Пак Ктабдай са шумуд виш келима рикIел хуьн герек къведай. Семинариядин сад лагьай курсуна ада гузвай Катихизисдин тарсар – бинейрин бине, православидин мировоззрение арадал гъизвай диб – рикI алайбур жедай. Катихизис чир хьайидалай кьулухъ амай вири тарсар чирун кьезил акъваздай. Сухтайри адан тарсар рекьера къекъуьнин кьабулнавай къайдайрихъ галаз гекъигдай: абур чир хьайила архайиндаказ уьмуьрдин регьят тушир сиягьатдиз экъечIиз жедай. И. А. Глуховаз вичин лекцийрин метлеблувал яб гузвайбурун руьгьер Православидин илимдалди экуь авунай, чпин хъсан ерийрихъ элкъвена абуруз Гьакъикъат ачухунай аквазвай. Ам гьамиша православидин сергьятрал кIевиз акъваздай, и карни экуменистрихъ ва диндин маса жуьрейриз ибадат ийизвайбурун векилрихъ галаз диалогра иллаки кьатIуз жедай. И. А. Глухован лекцийриз яб гайибуру ам гьуьрметдивди гзаф хъсан, алакьунар авай, вичин дерин чирвилер жумартдиз студентриз пайзавай педагог, гьарайдиз гьай лугьудай ва масадан рикIикай хабар кьадай инсан хьиз рикIел хкизва.

КIелзавайдаз теклифзавай «Православидин катихизис» - им православидин дин чирун патал гегьеншдиз малуматар гъанвай ктаб я, ада инсандиз диндикай, умудлу хьуникай ва кIанивиликай чирвилер гузва. Хашпара диндикай илим куьруьдаказ Диндин символда ачухарнава, ана хашпара диндин кьилин вири гьакъикъатар агудна ганва. Хашпара умуддикай илим дуьайра, кьилди къачуртIа, «Отче наш» («Буба чи») дуьада, ва «хушбахтлувилин заповедра» гьатнава. Хашпара кIанивилин илим Аллагьдин Къанунда ва я Десятисловида ганва.

И. А. Глухован «Православидин катихизис» – Православидин бинеяр чириз куьмек гудай ва и диндин яратмишунрихъ галаз дуьз къвезвай ктаб я, гьа са вахтунда ада автордин руьгьдин деринарни ачухарзава, Аллагьдиз къуллугъ авунин рекье адан вичин иман, умуд ва кIанивал ва и ерияр вичин аудиториядив агакьарун ва абурун руьгьера мягькемарун патал ада ийизвай чIехи алахъунар къалурзава.