Иван Александрович Глухов (1927–1999) Тульск областин Суворовск района Кулешово селəнд ачлл ханмҗта күч-көлсчнрин өрк-бүлд төрсмн. Үнн алдртын шаҗни йосар сурһмҗлгдҗ өссндəн олнла таарсн седклтə, көдлмштəн кинəн, төсүн заңта күн бəəсмн. Өсəд-босад бий күн болхднь ик нилчəн күргснь кемб гихлə, насни турштан таңсг кевəр тевчҗ дурлдг хəəртə экнь - Евдокия Сергеевна. 30-гч җилмүдт эдн өрк-бүлəрн Москвад нүүҗ ирəд, тендəн, 1945-гч җилд, Иван дунд сурһуль, 1948-гч җилд – тосхлтын мергҗлң төгсəһəд, хөөнь московск эдл-ахун заллтд техникчəр көдлсмн. Терүнəсн нань, Алексеевск селəнə Тихвинск чонҗин шаҗни хару седклтə əмтнə тоод орад, мандлын өөр сөөвңгин керг күцəдг бəəсмн.

Бурхнд шүтдгин сурһаль авхд седклəн өгсн И. А. Глухов 1951-гч җилд Москуһин Оюни семинарьд орад, терүгəн 1955-гч җилд күцəмҗтəһəр төгсəсмн. Хөөннь эн Москуһин Оюни Деед Сурһалин оютнрин тоод орад, терүгəн 1959-гч җилд шаҗни номин шевҗə гидг зерг зүүҗ төгсəсмн. Сурһалян төгсəхдəн күцəсн энүнə өгүлл аҗлнь «Хар санан болн терүнə туск христианск ном» гидг төрəр бичгдсмн. Деед Сурһалин Хүүвин шиидврəр И. А. Глухов багштна цальңт оютна тоод авгдад, Деед Сурһальдан үлдəд, шалһҗ бүрткəчин нөкдт төмлгдсмн. Семинарьдан тегəд сурһалин чимгиг, Орс Чонҗин тууҗиг эклəд дасхдг болсмн, 1972-гч җилəс авн болхла – сектын туск медрлиг Деед Сурһальд заадг бəəсмн. Тер җилдəн эн доцентын цолдан батлгдсмн.

Кинҗ көдлсндəн И. А. Глухов хутгт нойн Владимирын III-гч зергин, хутгт Сергий Радонежскийин II-гч болн III-гч зергүдин ачлврмудар болн Тергүн камбин һашгар шаңнгдсмн. 1995-гч җилд Əрүн Һазрур даянчлҗ, мөргүлд одад ирсмн. Өтрлх наснаннь өмн өргнд И. А. Глухов Цуг Хутгтнрин Московск сүмин шаҗни хару седклтə əмтнə тоод бəəсмн, өөд болснаннь дару тенднь тегəд энүнə буйинь кесмн; Иван Александрович Благовещенск селəнд оршагдсмн.

И. А. Глухов бат медрл орулҗ, халтаһар шалһҗ шүүвр авдг, чаңһ неквртə багш бəəсмн. Келхд, Əрүн Бичгд багтдг кедү зун цецн үгмүдиг чееҗəр медх кергтə бəəсмн. Үнн Алдртын шаҗни йиртмҗин үзлин сүүр тогтадг Сурһалин чимг дасхдг зүүл семинарин негдгч курсин оютнр дунд хамгин хəəртəд тоолгдмн. Энүг сурч эзмшснə хөөн наадк зүсн-зүүл тоотыг дасхд амр болдг. Шевнрнь эн предметиг хаалһин көдлгəнə зокалмудла дүңцүлдг бəəҗ. Терүг медҗ авсна хөөн əмдрл-бəəдлин адрута-бүдрүтə хаалһин мөр əəмшг угаһар мөрдҗ болна. Эврə ном əəлтхлин күслиг И. А. Глухов шевнриннь яс-чинртнь дурдҗ, теднəн шаҗн тал зөрүлҗ, соңсачнриннь седклиг Үнн Алдртын сурһаляр гегəрүллһнд үздг бəəсмн. Эн мергҗлтн əрүн хутгтнрин үзл-хəлəцəр оньдин бəрмтлдмн, тернь экуменистнрла болн оңдан номин чигн сүзгчнрлə бəрдг күүндлцəнд онцһа кевəр медгддг бəəсмн. И. А. Глуховин ном əəлтхл соңссн улс энүг төгсм эрдм хоршасн, эврə медрлəрн оютнрлаһан хармл уга хувалцдг, килмҗтə, ач иктə багш гиҗ ханмҗтаһар тодлна.

Умшачнрин оньгт тусхагдҗах «Сурһалин чимг» үнн алдртын шаҗниг медхд түлкц өгдг күцц көтлвр болсн деерəн иткл, нəəлвр, дурна туск номд сурһмҗлхднь тусан күргнə. Христианск шаҗни туск ном итклин Белгдлд ахрар өггдҗəнə. Терүнд, олн талст метəр, кирс зүүдг номин һоллгч үнн бүгдəрн багтсн бəəнə. Христианск нəəлврин туск сурһаль зальврллһн дотр, тер мет, Деедсд зальврдг «Эцк мана» мааньд болн амулңгин Герəснд орсн бəəнə. Христианск дурна туск сурһаль Бурхни Заканд, эс гиҗ Арвнт үгд багтсн бəəнə.

И. А. Глухов нəəрүлсн «Сурһалин чимг» Үнн Алдртын уңг-сүүриг əрүн хутгтнрин үүдəврмүдлə бүрн ирлцүлҗ болн Бурхнд нерəдсн түүрвəчин бийини иткл, нəəлвр, дурн һурвиг, тер мет соңсачнриннь серлд чигн тиим сурһмҗ орулҗ, батлхар бəəх зөрлһинь медүлдг заавр мөн.